پریاگ راج ، 27/ جون (ایس او نیوز /ایجنسی) میڈیکل کالجوں میں داخلے کے لیے ہونے والے نیٹ امتحان کے پیپر لیک کا معاملہ اب اتر پردیش پہنچ چکا ہے۔ ملزمین کو پکڑنے کے لیے بہار پولیس نے الہ آباد (پریاگ راج) میں چھاپہ مارا لیکن وہ نہیں ملے۔ بہار پولیس ایک ڈاکٹر اور اس کے بیٹے کو تلاش کر رہی ہے۔ ڈاکٹر پر الزام ہے کہ اس نے نیٹ کا امتحان دلانے کے لیے اپنے بیٹے کی جگہ پر جودھپور ایمس کے ایک طالب علم کی ’خدمات‘ حاصل کی تھیں۔

رپورٹ کے مطابق ملزم ڈاکٹر کے بارے میں اطلاع ملی ہے کہ وہ آرتھوپیڈک سرجن ہے۔ الہ آباد میں اس کا ایک اسپتال بھی ہے۔ ڈاکٹر نے اپنے بیٹے کے نیٹ امتحان میں شرکت کے لیے درخواست فارم بھی بھرا تھا۔ ڈاکٹر درخواست دینے سے پہلے ہی پیپر لیک کرنے والے گروپ سے رابطے میں تھا۔ ڈاکٹر نے اپنے بیٹے کی جگہ جودھ پور ایمس کے ایک طالب علم سے امتحان دلوایا تھا۔ درخواست فارم میں ڈاکٹر کے بیٹے کی جگہ جودھپور ایمس کے طالب علم کی تصویر لگائی گئی تھی۔ اس کا فرضی آدھار کارڈ تیار کیا گیا تھا۔ ڈاکٹر کے بیٹے کا امتحان دینے کا سنٹر بہار کے مظفر پور کے ڈی اے وی کالج میں تھا۔

ڈی اے وی کالج میں امتحان کے دوران جعلی امیدوار کو پکڑ بھی لیا گیا تھا مگر وہ پکڑے جانے کے باوجود سرکاری عملے کی لاپرواہی کی وجہ سے فرار ہو گیا تھا۔ معاملے کی جانچ کر رہی مظفر پور پولیس دو دن پہلے الہ آباد آئی۔ یہاں ڈاکٹر اور اس کے ملزم بیٹے کے کئی ٹھکانوں پر چھاپے مارے گئے۔ پولیس کی چھاپے ماری سے قبل ہی ڈاکٹر اور اس کا بیٹا دونوں فرار ہو گئے۔ پولیس کو ملزم آرتھوپیڈک سرجن کے ہسپتال جانے کی بھی اطلاع ملی ہے۔ ڈاکٹر کا نام آر پی پانڈے ہے۔ الہ آباد کے ہی نینی علاقے میں اس کا ایک اسپتال ہے۔